/
news/ဆရာ၀န်ကြီးများ-၏-ဆောင်းပါးများ/နေ့လယ်စာလေး-ချက်စားကြရအောင်

နေ့လယ်စာလေး ချက်စားကြရအောင်

Category
ဆရာ၀န်ကြီးများ ၏ ဆောင်းပါးများ

        အိမ်ရှိ လူကုန်အလုပ်လုပ်ရတဲ့အခါ ကိုယ်ပိုင်အလုပ်လည်း မဟုတ်ကြဘူးဆိုရင် ၀န်ထမ်းအဖြစ် ရုံးတွေ၊ ကျောင်းတွေ၊ ကုမ္ပဏီတွေဆီသွားပြီး တစ်နေကုန်အောင် အနည်းဆုံး အလုပ်ချိန် 8 နာရီ သို့မဟုတ် 9 နာရီလုပ်ကြရပါတယ်။ တချို့ဆို အလုပ်ချိန်ကန့်သတ်ချက်တောင် မရှိအောင် အလုပ်ရှင်အလိုကျ လုပ်ကိုင်ပေးရတာမျိုးရှိလာတော့ ထမင်းချိုင့်ဆိုတာ ေ၀လာ ေ၀း၊ နီးစပ်ရာဆိုင်တွေမှာ ဗိုက်ဆာချိန် ၀င်ထိုင်လိုက်ရတာရှိပါလိမ့်မယ်။ ၀င်ငွေသိပ်နည်းရင်တော့ အိမ်က အပင်ပန်းခံ အချိန်ယူပြီး ချိုင့်နဲ့ထည့်လာရလိမ့်မယ်။ ဒါမှမဟုတ် လတ်လတ်ဆတ်ဆတ် အိမ်ထမင်း၊ အိမ်ဟင်း ကျန်းမာရေးနဲ့ညီညွတ်အောင် စားမှ အသက်ရှည်နေထိုင်ကောင်းမှာလို့ဆိုပြီး ချက်ပြုတ်လာခဲ့သူတွေလည်း ရှိပါတယ်။

          ဒီနေရာမှာ ထမင်းနဲ့ဟင်းချက်ဖို့ အချိန်မပေးနိုင်ကြတဲ့သူတွေအဖို့ ကြုံရာကျပန်း စားသောက်ဆိုင်ကြီးငယ်တွေမှာ မိမိရဲ့ လုပ်အားခလစားအနည်းအများလေးနဲ့ ချင့်ချိန်ပြီး ၀ယ်စားကြတယ်။ မည်သည့် စားသောက်ဖွယ်ရာဆိုင်ပင်ဖြစ်စေ ဆီးဦးထောပတ် အကောင်းလွန်နေအောင် ချက်ပြုတ်ထားကြမှာပါ။ အဲဒီတော့ အချိုကဲ၊ အငန်ကဲ၊ အစပ်ကဲ စသည်ဖြင့် ဆား၊ ဟင်းခတ်မှုန့် တစ်နည်း ဟင်းချိုမှုန့်နဲ့ ဆီ အထူးသဖြင့် စားအုန်းဆီနဲ့ တိရစၧာန်အဆီတွေက ခန့်ခန့်ကြီး နေရာယူထားလေ့ရှိပါ တယ်။ ဒါတွေ နေ့စဉ်စားသူတွေအဖို့ အပိုကယ်လိုရီနဲ့ အငန်ဓာတ်တွေ မြင့်မားလာကြမှာ မလွဲပါဘူး။

          ကျန်းမာရေးနဲ့ ညီညွတ်မျှတ သင့်တင့်တဲ့ နေ့လယ်စာလေး စားချင်းကြမှာ လူတိုင်းရဲ့ ဆန္ဒဖြစ်လိမ့်မယ်။ အဲဒီနေ့လယ်စာကို ချက်ပြုတ်ရတာဟာလည်း လွယ်ကူရိုးစင်းပါတယ်။ ဒါ့အပြင် အာဟာရဓာတ်လည်း ပြည့်၀ပြီး အရသာရှိမယ့် နေ့လယ်စာလေးကို ဘယ်လိုလုပ်ပေးနိုင်လဲဆိုတာအောက်ပါအတိုင်း ဖတ်ကြည့်ပါ -

          တကယ်တော့ ကျန်းမာရေးနဲ့ ညီညွတ်တဲ့၊ အာဟာရဓာတ်ပြည့်၀တဲ့ နေ့လယ်စာမှာ (1) အဆီမပါအသား၊ (2) ဂျုံကြမ်း သို့မဟုတ် ဆန်ကြမ်း၊ (3) ဟင်းသီးဟင်းရွက် လတ်လတ်ဆတ်ဆတ်နှင့် သစ်သီးများ၊ (4) အသားမဟုတ်တဲ့ ပရိုတင်းများ (ပဲအမျိုးမျိုး) တို့ကို တစ်မျိုးစီလှည့်ပြီး ချက်ပြုတ်ဖို့လိုပါတယ်။ မကောင်းတဲ့အဆီမပါ အသားဆိုရာမှာ ငါးအမျိုးမျိုးအထူးသဖြင့် ပင်လယ်ငါးအမျိုးမျိုး၊ အရေခွံထုတ်ထားတဲ့ ကြက်နှင့် အစေ့အဆန်များ၊ တိုဟူး၊ ပဲသီးအမျိုးမျိုး၊ ဘရောင်းရိုက်စ် ခေါ် ဆန်လုံးညို၊ ဟင်းရွက်သုပ်ရာမှာ သုံးမယ့်ပစ္စည်းများ ဥပမာ - ပဲမှုန့်၊ နှမ်းဆီစိမ်းမွှေးမွှေးလေး အနည်းငယ်၊ ဆားအနည်းငယ်၊ သံပရာသီး၊ နံနံပင် သို့မဟုတ် ပင်စိမ်းစသည်တို့ရှိရပါမယ်။ ခပ်စပ်စပ်လေးစားချင်ရင် ငရုတ်သီးစိမ်းလေး 2 တောင့် ထည့်ပေးနိုင်ပါတယ်။

          ဟင်းရွက်သုပ်ရတာ လွယ်ကူရိုးစင်းပြီး လုပ်ရတာလွယ်ပါတယ်။ ဟင်းရွက်သုပ်လေးတွေ နှစ်သက်လာရင် ဆီပြန်ဟင်းတွေ၊ ဆီများတဲ့ဟင်းတွေ သိပ်မစားဖြစ်တော့ပါဘူး။ ဒါ့အပြင် အဲဒီ ဟင်းရွက်သုပ်ထဲမှာ အသားပြုတ်ပြီးသားတွေကို ထည့်ပြီးရောသမ သုပ်ပေးနိုင်ပါသေးတယ်။

          ဒီနေရာမှာ စတိုးဆိုင်ကြီးတွေက အသုပ်သုပ်ရန် ရယ်ဒီမိတ် ဆလပ်သုပ်အရည်တွေကို သတိထား ၀ယ်ယူသုံးရန်လိုတယ်။ တချို့ ဆလပ်သုပ်ရည်များဟာ မယောနီးစ်၊ ချိစ်၊ ထောပတ်တို့နဲ့ လုပ်တာမို့ အဆီဓာတ်မြင့်မားပါတယ်။ ပါ၀င်ပစ္စည်းများကို ဖတ်ကြည့်ပါ။ တူနာငါး၊ ကြက်သား၊ ကြက်ဥနဲ့ သုပ်တာလား၊ သကြားဘယ်လောက်ထည့်ထားလဲ၊ ဆားနဲ့ ဆီရော ပါ၀င်မှုများလားကြည့်ပါလေ။ ကယ်လိုရီရော ဖော်ပြထားလားစစ်ဆေးပါ။ နေ့လယ်စာကို အောက်ပါအတိုင်း ပြင်ဆင် ကြည့်ရအောင် -

အဆင့် (1)

          ဟင်းရွက်အခြေခံပါ။ ဥပမာ  - ဥနီ၊ ဆလပ်ရွက်၊ ဂေါ်ဖီ၊ ဟင်းနုနယ် စသည်ဖြင့် အဆင်ပြေရာလုပ်ပါ။ အစိမ်းသုပ်လား၊ ရေနွေးဖျောမလား မိမိနှစ်သက်ရာ စီစဉ်ပါ။

အဆင့် (2)

          အသားဓာတ်ပါအောင် ထည့်နိုင်ပါတယ်။ အသားပြုတ်ပြီးသား သို့မဟုတ် ငါးပြုတ် သို့မဟုတ် အစေ့အဆန်၊ မြေပဲ၊ ပဲတစ်မျိုးမျိုး နူးအောင်ပြုတ်ပြီးသား စီစဉ်ပါ။ ပဲက အမျှင်ဓာတ်များလို့ အကောင်းဆုံးပါ။ ပဲသီးအမျိုးမျိုးလည်း အရမ်းကောင်းပါ တယ်။ ကယ်လိုရီနည်းပါတယ်။ ဆီစိမ်း သို့မဟုတ် ဆီကျက်အနည်းငယ်ထည့်ပါ။

အဆင့် (3)

          နှမ်းလှော်၊ မြေပဲလှော်ထောင်း သို့မဟုတ် ခရမ်းချဉ်သီး သို့မဟုတ် နံနံပင် စသည်ဖြင့် ရနံ့မွှေးမွှေးလေးထည့်သုပ်နိုင်ပါပြီ။ ပဲပုပ်တစ်ချပ်လောက် မီးဖုတ်ထောင်းထည့်နိုင်ပါသေးတယ်။ ပဲဆိုရင်လည်း နှပ်ပြီးစားနိုင်သလို၊ ပြုတ်ပြီး အသုပ်လုပ်စားနိုင်ပါတယ်။

အဆင့် (4)

          ကယ်လိုရီနည်းစေချင်ရင် ဆန်လုံးညို (Brown Rice) သို့မဟုတ် ဂျုံကြမ်း၊ ပေါင်မုန့် 2 ချပ်နဲ့ ထိုအသုပ်လေးကို စားခြင်းဖြင့် ဗိုက်၀လာမှာဖြစ်တယ်။ စားရတာလည်း စိတ်ကျေနပ်ပြီး တစ်နေကုန် အဆာခံပါလိမ့်မယ်။ ပြီးရင် သစ်သီးလေး တစ်မျိုးမျိုးကို အချိုပွဲအဖြစ် ဖန်တီးစားပါလေ။

 

 

 

Credit: ဒေါက်တာရည်ညွန့်မေ

Health Digest Journal

Vol: 13, No: 36, 15-6-2016